Oude IJsselstreek

A’j plat kunt proaten,
Mo’j ‘t neet loaten.
In ‘t Achterhooks is dat zo mooi ezeg
D’r is wel hier en doar wat verschil eleg.

Ho’ j de weurde uut mot sprekken
Hef et Staringinstituut al vergelekken
Dee leu bunt dat wèzen uutzuuken
En beschreven dat in de WALD-buuke.


In d’ene plaatse is een “muis” n’n moes,
Argens anders is ’t weer een muus,
Ok zo met “huis”, hier is ‘t ’t hoes
En ’n ende wieter het ’t in ens weer ’t huus.


Dat gif mangs een heftig dispuut,
Doar kom ie’j ech neet uut.
Moar de weurde betekent al’ens.
’t Is dudeluk zo, veur ieder mens.


Moar “adig” is noe net zo’n woard
Dat zich doar neet an stoart.
Het is trouwens wel heel eigenadig
Met dat bezundere “adig”.


Ie’j wet van te veuren nooit
Of ’t noe adig vrus, of adig dooit.
Mangs meent ze met adig: misseluk
En mangs betekent ’t ok: vrindeluk.


Dat ku’j allene uut ’t zinsverband opmaken
En dan mo’j neet in de warre raken.
Want dan kom ie’j adig in de bonen terech
’t Is moar, da’k ’t oe zo adig heb’ezeg.